By Chidi Anthony Opara
Oga big bank governor,
You dey share our money
For your village bomb victim dem
Like say na your money.
As you dey share,
Make you share reach everybody,
All of us for Naija na victim.
Who dey for Naija
Wey no be victim?
Some na bomb victim,
Some na disease victim,
Some na thief victim,
Some na hunger victim.
Which one I go talk,
Which one I no go talk.
All of us for Naija na victim.
Even sef
We be your victim.
You siddon for big bank
Dey speak big grammar,
Our money dey disappear.
Di small one wey remain
You carry go share
For your village bomb victim dem.
You share two,
You say you share four.
Oga big bank governor,
As you dey share
Make you share reach all of us,
All of us for Naija na victim.
More Dey For: Na For Poems
No comments:
Post a Comment