USA Africa Dialogue Series - We Wey Say We Be Writer (Nigerian Pidgin English Poem)

By Chidi Anthony Opara

 

Day break

We dey write,

Day dark

We dey write.

We wey say we be writer,

We dey write

Like say we be better people.

 

We dey write

Di bad thing dem

Wey bad people dey do.

We wey say we be writer,

We dey write

Like say we be better people.

 

For inside government

We dey put eye,

For inside God work

We dey put eye,

Even inside other people matter

We dey put eye,

We dey put eye everywhere.

We wey say we be writer,

We dey write

Like say we be better people.

 

For under di table

Wey we siddon dey write,

For under di chair

Wey we siddon dey write,

Plenty dirty full ground.

We know say di dirty dey,

We no dey write dat one.

We wey say we be writer,

We dey write

Like say we be better people.

More Poems Dey For: Na For Poems

 

About Me