USA Africa Dialogue Series - "Yeye Award For Dream" By Chidi Anthony Opara

Me too wan do am

But I no fit do am.

I been wan reject

One yeye award like dat

Wey dem been wan

Give me for dream.

For di dream,

People gather well well.

Big big Abuja people

Been gather for one place

Like dat for inside Abuja.

Dem dey wait for me

To come collect

One yeye award like dat

Wey carry plenty money inside.

One mind dey tell me

Make I reject di award,

Another mind dey tell me

Make I no reject di award.

Na im I remember

Say hungry dey for house.

I remember

Say school fees no dey,

House rent no dey,

Nothing dey.

I remember

Say work no dey,

Business sef no dey,

I remember

Say man pickin no fit reject di award.

Na im I come waka

Dey go small small,

I come waka

Dey go collect di award.

As I waka reach di place,

Na wake I come wake.

Originally Published On: Na For Poems at 11/17/2011 09:58:00 AM