(Nigerian Pidgin English Poem By: Chidi Anthony Opara)
Beeb dem don full town.
Dem don wear soft soft trouser,
Dem don wear small small shirt,
Dem don do mammy water hair.
Dem don package dem front side
Dem backside sef dem don arrange well well
Dey waka like shekeleke.
Na small small laugh,
Na aje butter voice
Dem dey take greet di men di men,
Christmas waka don start.
Di men di men na aristo.
Aristo na men
Wey dey carry big fine ride
Dey do dem own Christmas waka.
Dem dey cruise for town
Dey find beeb.
For short time joint
Na money for hand
Body for bed.
Beeb go drop bill,
Aristo go settle di bill,
Action don start be dat.
After after,
Drink go flow,
Chop chop go follow.
Aristo
Go dey laugh big big laugh,
Dey talk big big talk.
Beeb
Go dey laugh small small laugh,
Dey talk small small with aje butter voice.
Reproductions in part or in whole, in whatever forms, of ChidiAnthonyOparaPoetry/Quotes except for non-profit information and education purposes, without a written permission from the Author is not allowed.
No comments:
Post a Comment